Նկարագիր

Սեսիան ներկայացնում է Ցանցի Չեզոքություն հասկացությունը, որը չունի հստակ սահմանում հեռահաղորդակցությունը  կարգավորող մարմինների կողմից: Լայն մեկնաբանմամբ Ցանցի Չեզոքությունը ենթադրում է, որ Ինտերնետի բոլոր արձանագրություններն ունեն նույն նախապատվությունը, բոլորն իրար հավասար են: Սա իր հերթին նշանակում է, որ ցածր թողունակություն ունեցող կապուղիներում, արձանագրությունները կտեղափոխեն տեղեկատվությունը նույն խնդիրներով` տեսահոլովակները «կսառեն», ձայնը «կկտրտվի», խաղերի կերպարները «կսպանվեն»: Հեռահաղորդակցության Միջազգային Միությունը (ՀՄՄ) ընդհանուր առմամբ չի անդրադառնում  հասկացության սահմանմանը, ավելին՝ ՀՄՄ-ն հակադրում է «Ցանցի Չեզոքություն» հասկացությունը «Ծառայության Որակ» հասկացությանը և հետևողական պահանջում է ապահովել հեռախոսակապի համար սահմանված որակի չափորոշիչները: Ինտերնետի զարգացումը հանգեցրել է նրան, որ օպերատորներն այսօր սկսել են տանել խողովակի դեր, որով այլ ընկերություններ մատուցում են իրենց Over the Top ծառայությունները, օրինակ` Facebook, Google, Viber` ստանալով գերեկամուտներ և չկիսվելով օպերատորների հետ իրենց շահույթներով: Որոշ օպերատորներ սահմանափակում են ծառայության որակը կամ մի քանի վայրկյանով, կամ էլ կտրուկ նվազեցնելով կապի որակը ձայնի համար: ՀՀ-ում օրենքով չի նախատեսվում որևէ տարբերակում հեռահաղորդակցության ծառայությունների համար, բոլորը կոչվում են Էլեկտրոնային Հաղորդակցության ծառայություններ: Սակայն գործող պրակտիկայի համաձայն ձայնային ծառայություններին տրված է «հեռախոսակապ» կամ «ձայնային ծառայություններ e.164 համարակալման պլանով»  անվանումը, որը բացակայում է օրենքում: Ինտերնետով տրամադրվող  ձայնային ծառայությունները կարգավորվում են միայն մեկ փաստաթղթով, այն է՝ պարտադիր անվճար պիրինգ ապահովելը Ինտերնետ ծառայություն մատուցողների միջև: Հեռախոսակապի համար օրենքով սահմանված է այլ կարգ՝ փոխադարձության հիման վրա, երբ րոպեների ծավալները իրար են համեմատվում և կատարվում է փոխհաշվարկ: Եվրոպական երկրներից Նիդերլանդները օրենքով սահմանել են Ցանցի Չեզոքությունը, ԱՄՆ-ում FCC-ն հայտարարել է, որ կարգավորելու է այդ հարցը, մի շարք երկրներում այդ հարցը քննարկման փուլում է: ՀՀ-ն կառավարության մակարդակով հաստատել է Ցանցի Չեզոքության սկզբունքները, որոնց գործարկման համար անհրաժեշտ են օրենսդրական կամ կարգավորման դաշտում փոփոխություններ:

Սեսիան նախատեսում է հետևյալ հարցերը.

– Ինչպե՞ս են նախատեսում ՀՀ օպերատորները գործել OTT (Over The Top) ծառայությունների տարածման պարագայում:
– Ինչպե՞ս է նախատեսում և նախատեսու՞մ է արդյոք ՀԾԿՀ-ն կարգավորել OTT ծառայությունները:
– Օրինակա՞ն է արդյոք Viber, Skype OTT ծառայությունների մատուցողների և տեղական օպերատորների փոխկապակցումը:
– Հնարավո՞ր է արդյոք միավորել պիրինգ և փոխկապակցում (նույն սահմանումն ունեցող) հասկացությունները:
– Ինչպե՞ս կարող է Ինտերնետ Փոխանակման կետը (կետերը) ապահովել անհրաժեշտ ծավալները` չգտնվելով կարգավորման դաշտում, ինչպիսի՞ չափանիշներով պետք է ղեկավարվի Տրաֆիկի Փոխանակման կետը կամ կետերը՝ e.164 արձանագրությամբ ձայնային ծառայությունների անխափան ապահովման համար:
– Ի՞նչ պետք է անել ապահովվելու ցանցի չեզոքության սկզբունքի կիրառումը բջջային ցանցերում:

Իմաստակիր բառեր

Ցանցի չեզոքություն, արձանագրությունների հավասարություն

Ձևաչափ

Սեսիա փորձագետների, վարողի և նոթագրողի մասնակցությամբ: Տևողություն 90 րոպե: